ليه ما يتكلم الببغاء ؟

المعروف والمشهور عند الناس ان طائر الببغاء يجيد الكلام والسواليف ، لكن القليل اللي يعرف ان ماكل ببغاء يتكلم ، موضوع كلام الببغاء و ليه بعضها تتكلم والبعض ما تتكلم  اثار فضولي وقررت ابحث في الموضوع .. طبعا اول مكان رحت ابحث فيه .. ما غيره سوق الحمام .. طبعا يسمونه سوق الحمام والا هو سوق كل الطيور واللي منها صاحبنا الببغاء .

في سوق الحمام طقيت اللطمه و  تقمصت دور واحد يبغى يشتري له  ببغاء وبشرط يتكلم (الريحه في السوق الله لا يوريك طالعة وفايحة ).. طبعا كل البياعين يقولون ان ببغاواتهم تتكلم لكن ما سمعت ولا واحد تكلم قدامي الين وصلت الى شايب ..

-         قال: خير

-         قلت: ابغى ببغاء .. بس يتكلم

-         قال : ما فيه  (قالها بعفاشة !! )

-         طيب وهذي الببغاوات؟

-         قال : هذي ما تتكلم

-         وليه ما تتكلم ؟

-         ما تتكلم على شانك انت واشكالك !!

-         قلت افا !!  .. انا ؟

-         قال ايه .. انت ! .. انت مخوفها .. متلطم و شكلك مباحث !!

-         قلت: يا ابن الحلال واش السالفة .. انا متلطم على شان الريحة المعتقة اللي مالية المكان .

-         المهم حاولت اتفاهم مع الشايب الين طابت نفسه و قال ابقول لك سالفت الببغاء مع الكلام بس لا تقول لاحد (مادري ليه قال لا تقول لاحد)

المهم  .. يقول شايبنا انه في يوم من الايام وفي الازمان الغابرة كان فيه صعلوك وعنده ببغاء (هذا الببغاء هو جد الببغاوات الموجوده اليوم) الصعلوك هذا فقير منتف ما عنده شي وميت من الجوع .. واش اكثر من صعلوك ..

في يوم من الايام مرت بقرة جار الصعلوك امام بيتهم .. الشيطان طبعا كان موجود وزين لاخينا الصعلوك ان يستدرج البقرة لداخل البيت ، وهذا اللي حصل ، الببغاء المسكين على نياته ما يدري بنوايا الرجال واكتشف متاخر ان البقرة مهددة بالموت  .. حاول يحتج و يصايح ويذكر خويه الصعلوك هذا حرام ما يجوزتذبح بقرة جارنا .. فذهبت توسلات الببغاء ادراج الرياح وكما قيل الجوع كافر

بعد ايام اكتشف الجار المسكين الحادثة و عرف ان جاره هو اللي ذبح بقرته و اكد له الببغاء الجريمه و عرض عليه الشهادة عند القاضي اذا له نيه شكوى .

الجار المسكين راح للقاضي يشتكي وعلى شان ماعنده دليل يثبت الجريمه طلب شهود فقال للقاضي ما عندي غير الببغاء شاهد ، فأرسل القاضي للصعلوك والببغاء الحضور من بكرة  .

الصعلوك حاول يثني الببغاء عن الشهادة لكن ما فيه فايده الببغاء راسه ناشف ومصر على الشهادة فخطط الصعلوك وحط خطه جهنمية وقال للببغاء خلينا ننام الليلة و بكره بيسير خير .

في الليل قام الصعلوك و غطى قفص الببغاء بطربال و طول الليل خذ يا رشرشة مويا فوق الطربال واللبغا مسكين يصايح وما يدري واش السالفة .

قاموا الصبح وأوهم الصعلوك الببغاء ان المطر طول الليل ما انقطع والدنيا غرقانه وانه ما قدر ينام والمسكين الببغاء عيونه حمراء من السهر و دايخ من التعب.

المهم راحوا للقاضي و في مجلس القضاء وبعد سماع الدعوى و انكار المدعى عليه  طلب القاضي الشهود فتقدم الببغاء بالشهادة و ذكر كيف استدرج الصعلوك البقرة وكيف ذبحها و اكل من لحمها .. المهم اعترض الصعلوك على شهادة الببغاء وقال للقاضي ان الببغاء طير يردد كلام وما عنده عقل ولا تفكير والدليل اسأل الببغاء كيف كانت الدنيا البارحة .. مسكين الببغاء ومن غير سؤال قال ما يبغى لها سؤال البارح ما قدرنا ننام من الامطار والبروق والرعود والناس بمن فيهم القاضي عارف هذا الشي .

القاضي رفض شهادة الببغاء و طرده من المحكمة وبعدين اكتشف الببغاء الخدعة و حلف ان ما يتكلم من ذاك اليوم وكتب هالكلام في وصيته لاولادة من بعده وقال الشايب الببغاوات اللي تتكلم اليوم خالفة وصية جدهم اللي راح ضحية صعلوك متلطم .